Պահպանողական Կուսակցություն

Եվրամիությանը Հայաստանի միանալու հարցով հանրաքվե կազմակերպելու նախաձեռնության հեղինակները հունիսի 20-ին Երևանում համաժողով էին հրավիրել։ Համաժողովի ընթացքում ելույթ ունեցան Պահպանողական կուսակցության նախագահ Հայկ Միրզոյանը, քառյակ կուսակցությունների ղեկավարներ Արամ Սարգսյանը, Արման Բաբաջանյանը, Տիգրան Խզմալյանը, Լևոն Շիրինյանը, հանրային գործիչներ, դեսպաններ, քաղաքագետներ և այլք։

Բանախոսներն անդրադարձան Հայաստանի՝ ԵՄ-ին անդամակցության քաղաքական և քաղաքակրթական նշանակությանը։ Ոմանք հիասթափություն հայտնեցին այն փաստի առնչությամբ, որ համաժողովին հրավիրված «Քաղաքացիական պայմանագիր» կուսակցությունից ոչ ոք չէր ներկայացել։ Այդ պատճառով իշխանություններին հանդիմանեցին վախկոտության մեջ։

Ներկաներից շատերը կարծիք հայտնեցին, որ ԵՄ-ին անդամակցումը կարևոր և որոշիչ նշանակություն կունենա, կլուծի շատ խնդիրներ, այդ թվում՝ անվտանգային, ինչպես նաև հնարավորություն կտա ազատվելու, իրենց որակմամբ՝ «կրեմլահպատակներից»։

Պահպանողական կուսակցության նախագահ Հայկ Միրզոյանը ԵՄ անդամակցելու ճանապարին առաջնահերթ համարեց օր առաջ լյուստրացիայի իրականացումը և սպառնալիքի ազդեցությամբ հափշտակված հանրային բարիքների ազգայնացումը միջազգային իրավունքի նորմերին համապատասխան։ Նա նաև ակնկալեց, որ ոչ միայն համաժողովին ներկա, այլև անկախության և ժողովրդավարության ջատագով բոլոր քաղաքական ուժերը կաջակցեն եվրաինտեգրման հարցում ժողովրդի մանդատի հաստատմանը։

Հանրաքվեի գաղափարի հեղինակ, Եվրոպական կուսակցության ղեկավար Տիգրան Խզմալյանը նշեց, որ պետք է հնարավորություն տալ հասարակությանը, որպեսզի ինքն ընտրի՝ ինչ է ուզում։ Եթե ժողովուրդը չհամաձայնի, ապա մենք արժանի չենք Եվրոպային, կամ հակառակը՝ Եվրոպան անհրաժեշտ չէ մեզ։ Իսկ «Հանրապետություն» կուսակցության նախագահ Արամ Սարգսյանը մի քանի անգամ ընդգծեց, որ իրենք՝ որևէ մեկին, որևէ բան չեն պարտադրում, այլ միայն իշխանություններին առաջարկում են հանրաքվե անցկացնել ԵՄ-ին անդամակցելու հարցով։

Համաժողովի ավարտին կուսակցությունների ղեկավարները և մասնակիցները ստորագրեցին ՀՀ իշխանություններին ուղղված կոչը Հայաստանի՝ Եվրամիությանն անդամակցելու դիմում ներկայացնելու մասին։

Նշենք, որ հունիսի 21-ին նույն թեմայով հանրային լսումներ են կազմակերպվելու ԱԺ-ում։

Աղբյուրը՝ Oragir.News, 20.06.2024թ․