ՎԵՐԼՈՒԾՈՒԹՅՈՒՆ

Իշխանությունների մերկությունը գոցելու հիմնական աղբյուրը նախկիններն են․ Միքայել Հայրապետյան․ 1in.am

«Առաջին լրատվականի» զրուցակիցը Պահպանողական կուսակցության նախագահ Միքայել Հայրապետյանն է։

– Պարոն Հայրապետյան,Սերժ Սարգսյանը ապրիլյան պատերազմում իր իշխանության վարքի հարցով ասուլիս է տվել։ Ինչպե՞ս եք գնահատում ասուլիսի փաստը, արդյո՞ք որեւէ նոր բան ասաց։

– Գնահատելի է, որ Ս. Սարգսյանն ասուլիս է տալիս, և այդ ասուլիսը չի խոչընդոտվում, ինչպես խոչընդոտվեց Ռ. Քոչարյանի ասուլիսը երկու տարի առաջ: Նոր բաներ, իհարկե, ասաց. բայց դրանց մեծ մասը խմբակային խնդիրների շրջանակից էր՝ անհատական ուղերձների ոլորտից: Ինձ համար առաջին հերթին ողջունելին՝ մի քանի տասնյակ «Մարտական խաչերի» գործող իշխանության «հրավառությանը» Սարգսյանի մոտեցումն էր, քանի որ դա ամենակարևոր՝ Հոգևոր անվտանգության ոլորտից է, որն այնպես ջանասիրությամբ շարունակում է ավերվել և՝ նոր եռանդով:

– Հայաստանի գործող իշխանությունները հեղափոխությունից հետո այդպես էլ գործուն պատասխանատվության չեն ենթարկել նախկին ուժերին, ինչն էլ վերջիններիս որոշակի ինքնավստահություն է հաղորդել։ Ըստ Ձեզ, սա ինչո՞վ կարելի է բացատրել։

– Չեմ կարծում, թե գործուն պատասխանատվության չենթարկվելն է նախկին ուժերին ինքնավստահություն հաղորդել: Գործող իշխանությունների ռազմավարության տեսանկյունից՝ նախկին ուժերին որպես միակ այլընտրանք ներկայացնելն օդ ու ջրի պես անհրաժեշտ է երկուստեք: Պարոնայք Քոչարյանին ու Սարգսյանին, ինչպես նաև նրանց համակիրներին քաղաքականություն ներքաշելն ու նրանց համար ամենաջերմոցային վիճակ ստեղծելը որդեգրված են որպես իշխանությունը պահելու, հանգիստ իշխանավարելու ամենադյուրին միջոց, թեև դա Հայաստանի ապագայի դեմ վնասաբեր մոտեցում է: Իշխանությունների մերկությունը գոցելու հիմնական աղբյուրը նախկիններն են, այլապես արդեն տեսանելի կլիներ այն, ինչը հայ հանրությունը տեսնելու է ուշացած և ափսոսանքով: Առաջին հերթին սա՛ է Ձեր նշած նախկինների ինքնավստահության աղբյուրը, թեև այլ աղբյուրներ ևս կան

–Հեղափոխությունից արդեն գրեթե երկուսուկես տարի է անցել, սակայն որեւէ կերպ քաղաքական գնահատական չի տրվել նախկին իշխանություններին։ Ձեր կարծիքով, ինչո՞վ է սա պայմանավորված։

– Իսկ ինչո՞ւ պետք է տրվեին քաղաքական կամ իրավական գնահատականներ, եթե իշխանության և նախկինների գոյությունը պայմանավորված է միմյանցով, ինչն էլ իր հերթին հաճելի է ընդհանուր տիրոջը: Չեմ բացառում, որ փորձ կարվի նախկին իշխանություններին իրավական գնահատական տալու իմիտացիա անել, ինչպես որ արվում են կրթական ոլորտի «արմատական բարեփախման» իմիտացիաներ: Սա՛ էլ է ուշ նկատվելու, ավաղ:

– Ի՞նչ զարգացումներ եք սպասում՝ հաշվի առնելով առկա իրողությունները։

– Եթե պատերազմական վիճակ ստեղծվի, ապա կարճ ժամանակում իշխանափոխություն է լինելու. դա շատ ցցուն է նաև այսօր: Այդ ժամանակ ներկա մանիպուլացիոն մեթոդները չեն աշխատելու: Իսկ եթե, Աստծո հաջողությամբ, պատերազմական դրություն չլինի, ապա ամենից հավանականն այն է, որ տարատեսակ մանիպուլյացիաներով ու արտաքին պլպլան պաճուճանքներով երկրի պետական ընթացքը կշարունակի լճանալ, ինչպես նախորդ 20 տարվա ընթացքում, որին կավելանան հասարակության ատոմիզացիան, փոխադարձ ատելության խորացումը, դեռևս աղոտ մարմրող արժեքների արժեզրկումն ու գավառականացումը: Մինչև վերջ չեմ կարող բացառել, որ Վարչապետը, այնուամենայնիվ, կփորձի գահավեժ ընթացքը փոխելու նպատակով նոյեմբեր-դեկտեմբերին կտրուկ փոփոխություններ կատարել, քանի դեռ դրա հնարավորությունը մինչև վերջ չի զրոյացել:

Հեղինակ՝ Արտակ Եղիազարյան, 23.08.2020, 1in.am


Share this Post: Facebook Twitter Google Plus Email
Copyrights © 2017 & All Rights Reserved.